قصيده الشاعر رائد ابو فتيان

1. من ثوب الوفه انشگ بالخيانه البيك
وغرورك صار قائد ثورة التفكير

بصريح القول ابد ما دوريت اعذار
انتهينه وأكدت ما خاني التعبير!!

اعرفك بير لكن ما اطخلك راس
اذا راضع سراب أمنين ماي ادير؟؟

ما مجبور ادنك بس اصيح بصوت
اذا يرجع صدى معناها خالي البير!!

بدون ايعاز عقلي الايد هي تروح
تگلب بالصور والحيره بيه تحير

خذتني الصورة جنت اوياك ايدب أيد
ضاجت حلت ايدك حتى بالتصوير!!

كاتلني الفراش شلون عنده اخلاق؟!
وردت طبعك تبدله ومثل طبعه تصير

ما يجرح الوردة وعنها يعله اهواي
متواضع ترى الفراش ناصي يطير!!

مثل لمة فخاتي اعضاي يل طاريك
صگر وشما يمرني اعضاي تتطشر

جرح تلعب بروحي وما هديت بيوم
واضطراب بجسمي عايش تصغر وتكبر!!

حلم وردي جنيتك كلت راح ارتاح
بس طوخته حيل وصار موت احمر!!!

گطن خضر براسي وفحم شعرك صار
وضحكت الشمس من گتلي شيب اسمر؟؟!!

الفلسفة الهلا والملگه احضنك حيل
وانه اعرف بس خواصر مشتها الخنجر

ضاع وياك تعبي وانته شخصك ضاع
وافضالي مشت مجهوله ماتذكر

لان اسم السهر مرتبط بس بالليل
الشمس متنام ابد لكنها ما تسهر!!!

وتگلي اگلبي ورقه وهي ورقة موت
واگلبها وترد وبروحي تتعثر

گلبت اوراق ياما وصخمتها وشوف
بعد ياورقه نگلب خلص الدفتر؟؟؟!!

عاشت لايادي عيوني زوزو وهلا بيج بلمنتدى